Vit kunnu ikki annað siga, enn at nógv er hent á ADHD økinum seinastu árini.
M.a. hava vit fingið ADHD/Autismuvegleiðingina, sum allir limir kunna venda sær til, umframt Heimaráðgevingingina til familjur við børnum við ADHD/ADD. Men enn er sera langt á mál, serliga er tað bíðilistarnir, ið bert vaksa fyri hvønn dag, við heilt øgiligum avleiðingum fyri tey børn, ið bíða í fleiri ár eftir hjálp. Hettar góðtekur felagið ikki longur og fer at arbeiða við rættindum til diagnosu, rættindi til tíðliga hjálp og javnrætt generelt.
Eisini fer felagið komandi ár, at arbeiða fyri atkomu til læring og arbeiði.
Fyrr helt man, at ein vaks frá ADHD/ADD, men soleiðis hongur tað ikki saman!
Á aðalfundinum, ið verður í morgin sunnudagin 27.mars kl.15 í Smæruni, verður varpað ljós á evnið “Kvinnur við ADHD”, umframt umboð frá Heimaráðgevingini koma at greiða frá nýggja tilboðnum sum Almannaverkið bjóðar.
Felagið hevur eftir fáum árum meir enn tíggjufaldað limatalið, sum í dag telur yvir 330 limir. Stóra limatilgongdin sigur nakað um tørvin og týdningin á arbeiðinum hjá felagnum og ynski og vónir um broytingar í okkara samfelag. Tað er ein heiður, men eisini ein sera stór ábyrgd at fáa. Megnar felagið at gera eitt gott arbeiði, so kann felagið verða við til at betra um gerandisdagin og framtíðarvánirnar hjá nógvum børnum og vaksnum við ADHD/ADD.
Tað er okkara aðalmál og fleiri vit eru, tess sterkari eru vit.
Til ber at melda seg sum lim á aðalfundurin í Smæruni J. H. Schrøtersgøta 7 frá kl.15-17.30 í morgin 27. mars.
Trý nevndaumboð standa fyri vali í morgin.
